故宫巧遇林郑月娥

　　图：林郑月娥（右二）昨日下午到故宫博物馆视察

　　政务司司长林郑月娥寻日上京，准备出席今日下昼喺故宫举行嘅一个文化项目签署仪式。林郑喺机场出发时就话，今日赴京唔会见中央官员，工作完全与文化合作有关。咁点解仪式今日下昼举行，寻日早上就起程呢？林郑就解释，系因为寻日下昼要到故宫睇场地，同参与项目嘅故宫朋友研究下相关工作。

　　最近到北京出差嘅郑晴，寻日下昼就决定碰下运气，买飞扮游客入故宫，睇下可唔可以成功巧遇林郑，可惜行近活动场地─故宫博物院报告厅一带时，就被保安拦住，话呢度系办公地方，游客唔可以随便入去。正当万念俱灰、准备离开故宫之际，郑晴就发现远处停泊住一架疑似林郑坐嘅接待小巴，又见到一大群人从一栋建筑物行出来，拿起相机当望远镜一睇，果然系林郑！只见佢同身边一位疑似系故宫人员嘅女仔交谈，故宫博物院院长单霁翔亦喺隔篱，陪同林郑嘅民政事务局常任秘书长冯程淑仪同康文署副署长吴志华，就攞住手机系咁影相，一行人之后又行入另一栋建筑，无几耐就上车离开。

　　200文物明年香港展出

　　作为庆祝香港回归二十周年嘅大型活动之一，香港艺术馆出年会同故宫博物院合办“养心殿─故宫博物院文物大展”。养心殿系雍正以后清朝皇帝嘅居住同办公地点，郑晴寻日都慕名嚟到养心殿，结果发现养心殿仲系闭馆復修之中，据悉馆内200多项珍贵文物从未在北京以外地方展示，出年将会运到香港让市民欣赏，大家真系有眼福啦！